Tradicional magosto na casa de Angelita e Arturo

A casa de Angelita e Arturo voltou a acoller un ano máis, a ducias de familiares e amigos que non quixeron perderse este xa tradicional magosto a base de castañas asadas, lamprea seca, viño novo e vello, chourizo asado e, como non, doces típicos da zona. Como non podía ser doutro xeito o bo humor e as risas  reinaron na reunión na que os convidados non deixaron de agradecerlle aos anfitrións que, ano tras ano, segan a organizar este magosto tan tradicional como familiar.

Os nevenses David Durán e Pablo Méndez participaron no Bádminton GP-VI Gran Premio Cidade de Leganés

Do 2 ao 4 de novembro de 2007, dous xogadores pertencentes ao CB As Neves participaron no Bádminton GP-VI Gran Premio Cidade de Leganés, unha proba dotada con 3000 euros de premios e cos mellores xogadores. Pablo Méndez e David Durán non acadaron pasar do 1/16 de final a pesares de realizar bos partidos. Os resultados quedaron así:

O alcalde de Ponteareas analiza cos veciños de Areas, Arnoso e Xinzo o desenvolvemento da terceira fase das obras de saneamento

O alcalde de Ponteareas, o popular Salvador González Solla, mantivo unha reunión cos representantes das asociacións veciñais de Xinzo, Areas e Arnoso para facer un seguimento das obras da terceira fase do saneamento destas parroquias, que se comezaron a executar a principios de outubro e que está previsto que rematen na primaveira-verán. O encontro, que se celebrou ás 20:00 horas nas dependencias da Casa do Concello e que contou tamén coa presencia do concelleiro de Servizos Comúns, Domingo Freitas, servíu para facer un seguimento das obras e das futuras conexións domiciliarias á rede de saneamento, así como tamén se abordaron outras cuestións referentes á execución dos traballos.

O día 26 de novembro comeza o obradoiro de arte floral de nadal no Centro Social das Neves

O concello das Neves continúa no mes de novembro coa programación de diversos obradoiros dirixidos a persoas maiores do concello. Neste senso, realizouse os días 2 e 3 (os venres, de 18:00 ata 20:00 horas e os sábados de 17:00 a 19:00 horas), nas instalacións do Centro Social. A responsable do curso foi Mari Paz Rodríguez. O día 26 de novembro comeza o II módulo do obradoiro de manualidades en arte floral de nadal que terá a Josefina Alonso como profesora. As clases prolongaranse os días 3, 10 e 17 de decembro, dende as 17:00 ata as 19:00 horas.

O BNG opúxose ás subas de taxas e impostos que foron aprobadas por PP-UCPA no último pleno de Ponteareas

A Viceportavoz do BNG en Ponteareas, Sandra Arauxo, criticou a decisión do PP e UCPA de incrementar “de maneira espectacular” numerosas taxas e impostos, que van supoñer “un incremento grave da presión fiscal sobre os veciños e veciñas de Ponteareas sen que ese aumento de impostos supoña unha mellora nos servizos nin o saneamento económico do concello”.

O BNG de Arbo congratúlase da posta en marcha do comedor escolar no colexio público Antonio Carpintero

O BNG de Arbo congratúlase da posta en marcha do comedor escolar no colexio público grazas a moción presentada polo BNG e aprobada polo Pleno Ordinario de Decembro de 2005, que permitiu que finalmente neste curso académico se puxera en marcha ese novo servizo.

Galiza Nova inicia as xestións para que Ponteareas teña un local de ensaio para grupos musicais

A organización xuvenil Galiza Nova de Ponteareas anunciou o inicio de xestións e actuacións diante da Vicepresidencia da Xunta, que dirixe o nacionalista Anxo Quintana, dirixidas a lograr que Ponteareas conte cun local de ensaio para grupos musicais da localidade.

A Deputación destina 231.490 euros para mellorar a estrada Ponte do Val-Barciademera, en Mondariz

A Xunta de Goberno da Deputación Provincial de Pontevedra aprobou o proxecto de mellora do trazado e do pavimento da estrada provincial Ponte do Val-Barciademera (Mondariz-Covelo), por un orzamento de 231.490,39 euros.
Esta actuación era unha demanda social longo tempo demandada pois o devandito tramo resulta moi perigoso para a alta densidade de tráfico que tén a estrada nese punto, particularmente para o paso de autobuses e transporte escolar. Na actualidade, esa estrada tén un ancho de catro metros que, coa actuación prevista, será sustancialmente mellorado e ancheado.
A obra aprobada ven a complementar a mellora integral do trazado desta provincial entre Mondariz e Covelo pois en datas recentes a Deputación xa adxudicou o tramo Barciademera-Covelo.