A Comunidade de Montes de Vide, As Neves, convida a todos os participantes na festa da Lamprea a visitar a Casa da Auga de Vide e o patrimonio etnográfico da zona

A Comunidade de Montes convida a todos os interesados e tamén a todos aqueles que se acheguen ata a 48ª Festa da Lamprea de Arbo, a visitar o patrimonio natural e cultural desta zona do Condado. No Concello das Neves e concretamente na parroquia de Vide, colindante con Arbo, pódese visitar a “Casa da Auga”, precioso edificio do século XVIII, restaurado pola Comunidade de Montes, onde se ubica un museo etnográfico que contén unha detallada exposición e información sobre as lampreas, os pescos ou pesqueiras e as diferentes artes de pesca, ademáis doutras temáticas relacionadas cos diferentes usos da auga e especialmente sobre unha das comunidades de regantes máis antigas do estado español. Tamén se pode visionar un vídeo sobre lugares de interés na zona e visitar, por exemplo, as pesqueiras da paneliña ou de Sela, a ponte romana da Senra, etc.
A Comunidade de Montes de Vide suxire aproveitar a fin de semana para descubrir paraxes de grande valor paisaxístico e museos como o da Casa da Auga de Vide, sen deixar de visitar tamén parte da riqueza patrimonial e etnográfica da zona.
Todos aqueles que desexen visitar a Casa da Auga poderán facelo concertando a visita no teléfono 699 076 313. O horario de apertura de martes a venres é de 17 a 18 horas e sábados e domingos de 17 a 19 horas; agás os meses de xullo e agosto que de martes a venres abrirá de 18 a 20 horas e sábados e domingos de 17 a 20 horas. Os luns e festivos permanecerá pechada.