A Peneira do Condado

Comezan as clases no IES do Barral

apeneiradocondado — Wed, 07 Oct 2009 17:16:50 +0000

Remontémonos a dous anos atrás, por non ir máis lonxe, cando comezaban as obras do novo instituto de ensinanza secundaria de Ponteareas.
Nese intre a primeira promesa: Redacción do PXOM para dotar de accesos ao IES, recalificar o solo e chegar a un acordo cos propietarios dos terreos necesarios para a construción do novo IES.
Anos despois o PXOM non chegou pero sí o instituto. Unha infraestructura situada nunha illa, sen accesos. Forzando a situación o concello decide que os alumnos accederán polo colexio Ramiro Sabell pero ¿e o resto?.
Aí comeza a segunda parte da trama que leva a uns pais fartos de mentiras a crear unha plataforma de afectados.
O alcalde, Salvador González Solla, convoca un pleno extraordinario para solicitar a expropiación forzosa dos terreos que separan o novo IES da N-120 para conseguir así un acceso provisional para emerxencias mentres non chega o Plan Xeral.
Ao día seguinte un pleno ordinario no que os afectados saen sen obter unha data de escolarización.
O curso escolar xa levaba unha semana de andaina e arredor de vinte alumnos asisten a clase en horario de tarde, algo que a Plataforma rexeita enérxicamente.
Os pais conseguen unha entrevista co Xefe Territorial de Ensino da Xunta, César Pérez Ares e o Secretario Xeral de Educación da Xunta, José Luis Vázquez Fernández. A cita foi na cidade de Pontevedra e a ela tamén acudiron a inspectora encargada da zona de Ponteareas e o alcalde, Salvador González Solla, aínda que segundo o voceiro da Plataforma non tiñan constancia oficial da asistencia do alcalde.
Durante a reunión, explica esta Plataforma, o alcalde de Ponteareas propuña o acondicionamento do conservatorio municipal para que os arredor de 245 alumnos do IES do Barral cursaran os primeiros meses deste curso escolar.
Arredor de corenta pais e nais asistiron a esta reunión na que Solla asegurou que o conservatorio era unha boa opción porque dispuña de seis aulas grandes baleiras e varias pequenas.
Aseguran os pais que trala reunión a propia inspectora trasladouse ao conservatorio ponteareán para comprobar in situ se era unha opción válida e redactar un informe.
“Pero ao chegar o conservatorio non pintaba tan ben como dicía o alcalde. As aulas non eran suficientes así que quedamos á espera dunha respota e dun informe da inspectora”.
Durante a reunión a inspectora propuxo adiantar unha hora o horario de tarde para sair tamén antes, unha iniciativa que a Plataforma de Afectados rexeitou no momento. Tamén se barallou a variación do calendario escolar retrasando o comezo do curso.
Mentres tanto, a Plataforma de Afectados pola non apertura do IES do Barral, segue coas movilizacións polas rúas de Ponteareas.
O luns día 28 toman o salón de plenos e péchanse nel ata o pleno extraordinario do xoves día 1 de outubro no que Salvador González Solla pide a revocación da expropiación forzosa para logo asinar cos propietarios dos terreos lindantes coa N-120 a cesión dunha parte.
Desconvócase o peche e a maquinaria da Deputación comeza a traballar para garantir que o mércores día 7 os alumnos poidan comezar as clases.
Trala reunión mantida co Xefe Territorial de Ensino na Xunta, César Pérez Ares e a inspectora de Educación da zona do Condado, os pais e nais da Plataforma de Afectados polo IES do Barral aseguran que o responsable de Educación manifesta o seu compromiso e a intención de tomar todas as medidas precisas para recuperar as horas lectivas perdidas.
Nun principio tentarase recuperar o tempo perdido dentro do horario escolar establecido pero non descartan tomar outras medidas, clases de apoio ou ampliación do horario escolar se fose preciso.
En resumo, por fin comezan as clases os máis de 250 mozos afectados procedentes do concello de Covelo e dalgunhas parroquias do concello de Ponteareas. Pero.. ¿grazas a que? Ao esforzo duns pais que durante quince días deberon conciliar vida laboral e familiar co peche nun salón de plenos e a loita polo cumprimento duns dereitos básicos que algúns pretendían obviar.

A Asociación ‘Os Amigos de Meder’, en Salvaterra, prepara este sábado unha xornada cultural

apeneiradocondado — Wed, 07 Oct 2009 17:08:12 +0000

A Asociación Cultural, Deportiva e Recreativa ‘Os Amigos’ de Meder, en colaboración co Concello de Salvaterra, organiza este sábado 10 de outubro unha ‘Xornada Cultural’ na Casa da Cultura desta parroquia.
Os actos previstos para ese día comezarán ás 18.00 horas, coa actuación do grupo de teatro ‘As titiriteiras’ e das pandereteiras ‘As Soallas’, do COR Escravas da Virxe Dolorosa (Mos). A continuación, subirá ao escenario a Banda de Música Cultural (As Neves).

Louzán estudará as propostas do alcalde de Mondariz Balneario para o Plan de Investimentos 2009-2011 da Deputación

apeneiradocondado — Wed, 07 Oct 2009 17:02:31 +0000

O presidente da Deputación, Rafael Louzán, reuníuse esta mañá co alcalde de Mondariz-Balneario, José Antonio Lorenzo, na Casa do Concello desta localidade. Nesta xuntanza Lorenzo trasladoulle ó presidente unha serie de peticións en relación co plan de investimentos 2009-2011 da Deputación neste concello.
Estas peticións recollen sobre todo cuestión relacionadas co saneamento así como necesidades pendentes no concello para poder completar a súa rede de servizos básicos. O presidente, pola súa banda, sinalou que nun curto espazo de tempo a institución provincial analizaría e priorizaría estas propostas, coa intención de recoller o maior número posible delas.
Despois desta xuntanza o Presidente puido visitar a Fundación Augas de Mondariz e facer un percorrido pola localidade, que definiu como a vila temal máis importante de Galicia, destacando a súa importancia turística.
Nesta liña de colaboración entre a Deputación e o Concello, e coa intención de reforzar o papel da vila termal como foro de encontro de xentes e cultura, a institución provincial colabora na realización do Festival de Jazz de Mondariz-Balneario, que terá lugar do 9 ó 12 de outubro no propio Hotel Balneario da vila.

Cruz Vermella Ponteareas pon en marcha un obradoiro de lecer para persoas maiores en Arcos

apeneiradocondado — Wed, 07 Oct 2009 16:59:59 +0000

A Asemblea Local de Cruz Vermella de Ponteareas, en colaboración coa Asociación de veciñas e veciños de Arcos, pon en marcha un proxecto dirixido ás persoas maiores desa localidade baseado nun taller de ocio seguindo a liña do proxecto “É o teu turno” que está en activo desde o ano 2005 na Asemblea de Ponteareas.
O taller terá unha duración de tres meses dando comezo o día 8 de Outubro e rematando o 17 de Decembro. Realizaránse os xoves de 16:30 a 18:00 horas na Casa Cultural de Arcos.

Este proxecto busca un achegamento paulatino ás persoas maiores que viven nos arredores do núcleo urbano, por medio dunha serie de actividades que intenten mellorar a súa calidade de vida, conservar a axilidade tanto mental como física e favorecer a independencia, así como tamén fomentar as relacións grupais evitando os sentimentos de soidade e abandono social.
Para conseguer isto, as actividades serán combinadas de xeito que cada semana sexa un taller diferente: manualidades, ximnasia, relaxación e exercizos para a estimulación da memoria e entrenamento cognitivo, ente outras.
Cruz Vermella aposta por un ximnasia Ponte en Forma,impartido tres días a semana durante todo o ano.

Cruz Vermella está presente tamén nos propios domicilios das persoas maiores en situación de dependencia a través dos Acompañamentos. Así mesmo, céntranse moitos esforzos no apoio as persoas coidadoras, na sua maioría mulleres, que dedican gran parte do seu tempo a coidar ós maiores. A organización ofrece programas como o Respiro ou Cambios Posturais e Apoio en Movilizacións.

Por outro lado a nosa institución dótase do servizo de Teleasistencia Domiciliaria. Deste xeito a persoa sentirase máis segura e autónoma frente calquera necesidade xurdida. Este servicio funciona as 24 horas do día, 365 días ó ano.

Para máis información poden dirixirse a:Cruz Vermella Asemblea Local Ponteareas C/ As Pombas s/n Centro Multiusos.
Teléfono: 986641794 / e-mail: ponteareas@cruzroja.es

A Asociación Forestal de Galicia organiza un curso de divulgación sobre a silvicultura de frondosas

apeneiradocondado — Wed, 07 Oct 2009 16:55:05 +0000

A Asociación Forestal de Galicia organiza os vindeiros 9 e 10 outubro en Ponteareas un curso de divulgación sobre a silvicultura de frondosas.
Os carballos, o castiñeiro, a nogueira, o bidueiro e o freixo son especies que vexetan moi ben nos nosos mellores solos e que poden chegar a ser moi rendibles para os produtores se se emprega planta de calidade e se poñen en práctica as modernas técnicas de silvicultura.
Tradicionalmente, a maioría das especies frondosas que poboaban os montes galegos tiñan múltiples aplicacións e eran moi apreciadas. A madeira destas árbores era empregada artesanalmente na construción, na elaboración de mobles, ferramentas e apeiros, na carpintería, tanto en interiores como en exteriores e nos talleres de ebanistería. O coidado destas árbores era, ao igual que a súa transformación, un labor artesanal asociado aos traballos agrícolas que se desenvolvían no medio rural. Consumo e produción mantiveron así un certo equilibrio durante moitos séculos.
Na actualidade o III Inventario Forestal Nacional pon de manifesto un importante incremento na superficie galega cuberta de frondosas. Tamén indica que os montes poboados por estas especies atópanse silvicolamente descoidados. Pola súa parte, o alto valor da madeira das principais frondosas nos mercados actuais e a toma de conciencia do seu alto valor ecolóxico, están impulsando a moitos propietarios forestais a realizar plantacións para conseguir producir madeira de alta calidade.

A Asociación Forestal de Galicia co patrocinio da Consellería do Medio Rural da Xunta de Galicia e os fondos FEADER da Unión Europea, organiza este curso encamiñado a difundir coñecementos sobre a silvicultura das nosas principais frondosas co fin de que os propietarios forestais poidan manexar con garantías de éxito as antigas masas e as novas plantacións. O curso constará de dúas sesións, a primeira delas centrarase na descrición das principais características das especies e a súa xestión silvícola, a segunda está destinada a realizar prácticas no monte que ilustren os contidos teóricos.
A sesión teórica terá lugar na Casa da Cultura A Antorcha de Cristiñade o 9 de outubro ás 19:00 horas. O día 10 ás 10 da mañá farase unha visita a plantacións forestais da zona feitas coas especies tratadas para observar no terreo os aspectos analizados na clase teórica.

O curso será impartido por Julio Ruiz Cagigal, enxeñeiro técnico forestal, director técnico da Asociación Forestal de Galicia con gran experiencia no campo da silvicultura.

Os propietarios forestais, particulares e comunidades de montes, así como expertos e estudantes da comarca interesados en asistir a estas sesións, poderán inscribirse gratuitamente chamando previamente aos números de teléfono 986 660 864 / 981 564 011 / 981 569 140.

Delfín Domínguez elixido membro da executiva provincial do PSdeG

apeneiradocondado — Wed, 07 Oct 2009 16:40:47 +0000

O edil ponteareán do Grupo Municipal Socialista, Delfin Domínguez Cerdeira, foi elixido membro da Executiva Provincial do PSdeG-PSOE, liderada por Modesto Pose.
O congreso provincial celebrado en Pontevedra o pasado sábado día 3 de outubro, foi o primeiro da nova etapa do PSdeG que cambia a estrutura comarcal vixente ate o de agora para adoptar a estrutura provincial, sendo Pontevedra a primeira das provincias galegas en celebrar o seu congreso constituinte.

Neste congreso a delegación da agrupación de Ponteareas encabezada por Francisco Candeira, tivo unha participación moi activa conseguindo que se aprobaran moitas das súas propostas na comisión de estatutos, propostas fundamentalmente políticas sobre o modelo de partido.

Tralo congreso Delfín Dominguez dixo “síntome moi honrado de poder representar a Agrupación de Ponteareas nesta primeira executiva provincial, que é histórica” . Por outra banda engadíu en relación cos motivos da súa elección “é o recoñecemento ó labor desenvolvido polos socialistas de Ponteareas nos últimos anos, asi como da vontade expresa do noso secretario xeral Francisco Candeira de propoñerme a mín para asumir esa labor”. En relación coas suas novas responsabilidades dixo “tratarei de aportar o meu traballo e a miña intelixencia para lograr un partido máis forte e útil para a sociedade, que responda e dea solucións eficaces ós problemas dos cidadáns”, ademais engadiu “vai ser moi estimulante, traballar conxuntamente con Modesto Pose por quen sinto un especial aprecio”.

Grandal asegura que o mal cheiro que hai en Salvaterra ‘ven dunha empresa do polígono industrial’

apeneiradocondado — Tue, 06 Oct 2009 13:18:10 +0000

O alcalde de Salvaterra, Arturo Grandal, recoñece que “ás veces hai mal cheiro na vila que non son debido ao mal funcionamento da depuradora, se non a problemas nunha empresa do polígono industrial. Hai tempo subsanámolos e agora volven producirse”, explica Grandal.

O alcalde manifesta que está “constantemente” en contacto coa empresa para tentar corrixir estes problemas.
Ademais engade que “o Bloque minte ao manifestar que estes cheiros son debidos á falla de mantemento da depuradora, xa que este mantemento estase a facer ben e faino unha das mellores empresas de Vigo”.
Segundo Grandal os vertidos da depuradora ao río Miño están dentro do que manda a lei xa que a Confederación Hidrográfica toma mostras e non comunica ao concello que estes vertidos estean fora da lei.
Por último, manifesta Grandal que aproba que o Bloque denuncie os cheiros que afectan aos veciños pero “outros cheiros e vertidos contaminantes graves ao río Caselas da depuradora de Salceda que afectan aos veciños de Cabreira a diario, tamén veciños de Salvaterra, e non o denuncian porque o alcalde de Salceda é do seu partido, o Bloque”.
Así, Grandal confirma que “esta alcaldía está presentando denuncias sobre estes vertidos e o concello de Salceda non toma medidas”.

O concello de Ponteareas continúa sen pagar ás historiadoras

apeneiradocondado — Tue, 06 Oct 2009 13:07:29 +0000

A historiadora María Victoria Martínez Rodríguez, gañadora do IV Premio de Investigación Fermín Bouza Brey convocado polo concello de Ponteareas no ano 2006, denuncia que ese concello continúa incumprindo as bases estipuladas na convocatoria do premio. O actual goberno municipal négase a aboar os 1500 euros que restan do premio en metálico e rexeita a publicación do traballo vencedor titulado “A muller no franquismo. A Sección Feminina en Ponteareas, 1936-1955”, xa rematado e en poder do concello de Ponteareas desde febreiro de 2009.

O goberno que preside Salvador González Solla xa tardara 18 meses en aboar os primeiros 500 euros que financiaban o proxecto de investigación gañador, so entregados cando a historiadora María Victoria Martínez Rodríguez fixo público nos medios de comunicación o non-pagamento do proxecto, o que provocou o atraso de ano e medio no inicio da investigación.

Dáse o caso que xa na anterior convocatoria, a do III Premio de Investigación Fermín Bouza Brey, o gañador, o historiador Ángel Rodríguez Gallardo, sufriu serios problemas para cobrar os 2000 euros totais do premio, ademais de obstáculos na súa investigación, neste caso centrado na represión franquista en Ponteareas durante a Guerra Civil. Eses obstáculos centráronse en restricións no acceso á documentación do arquivo do concello de Ponteareas ou no “desinterese” para a publicación da obra gañadora da que tivo que ocuparse o propio historiador, segundo explica o presidente da Asociación Memoria Histórica do 36 de Ponteareas, Angel Rodríguez Gallardo.

Desde a Asociación dá Memoria Histórica do 36 de Ponteareas, da que a gañadora é socia e membro destacado, entenden que son os temas tratados nos proxectos gañadores (a represión franquista, a Falanxe feminina e a ditadura franquista) os que impiden que o concello de Ponteareas incumpra as bases da convocatoria, que implica a entrega total de 2000 euros e a súa responsabilidade na publicación do traballo gañador. No caso do traballo de María Victoria Martínez Rodríguez poderíase coñecer por primeira vez a nivel galego cales son as estruturas organizativas do falangismo feminino no concello de Ponteareas e, por extensión, na provincia de Pontevedra.

“Aparentemente non é un problema de diñeiro, xa que a concellaría de Cultura do PP inviste significativas cantidades de diñeiro tanto na organización de festexos desmedidos, como na publicación de obras sobre o patrimonio cultural local, senón un problema de verse na obriga como representantes públicos de cumprir coas bases dun premio que eles mesmos convocaron, que foi concedido por unanimidade por representantes do concello e por destacadas personalidades académicas e que, sobre todo, colócalles fronte ao análise histórica e técnico dunha organización (a Sección Feminina de Falanxe) que é o precedente ideolóxico de moitos dos militantes e das militantes do seu partido”.

O BNG de Salvaterra denuncia os continuados cheiros no casco urbano

apeneiradocondado — Tue, 06 Oct 2009 13:01:10 +0000

O portavoz do BNG en Salvaterra, Gabriel Martínez, denuncia a existencia de malos cheiros continuados no casco urbano do municipio froito “da falta de mantemento da depuradora da Canuda e dos continuados vertidos ao río Miño sen o tratamento previo que require a normativa actual”. O grupo municipal nacionalista considera “inadmisible a irresponsabilidade ambiental e social do equipo de goberno, especialmente do alcalde, Arturo Grandal e da concelleira de medio ambiente e deputada nacional Marta Valcárcel”.

“Trátase dunha irresponsabilidade ambiental, porque se permite a contaminación do río Miño, no tramo do parque da Canuda en zona REDE NATURA 2000”, subliña o concelleiro nacionalista. Segundo Gabriel Martínez, esta situación é “máis grave se cabe, tendo en conta o enorme custo que supuxeron as obras deste parque. Semella irónico que o mal cheiro estea preto da área máis mimada do alcalde, que presume de ter un lago artificial pero carecemos de depuradora”, sinala.

Asemade, o edil do BNG asegura que esta situación agrávase “ao saltarse sen ningún tipo de pudor calquera normativa actual referida a augas superficiais e soterradas, entre elas a Directiva europea MARCO DA AUGA 2000/60/CE”. Neste sentido explica que esta directiva establece como obxectivo primeiro “Manter e mellorar o estado ecolóxico das masas de auga (…) e promover a xestión e o uso sostible da auga, baseándoa na protección dos recursos hídricos”.

O portavoz do BNG afirma que se trata tamén dunha “irresponsabilidade social, ao permitir que os veciños e veciñas vivan cos intensos fedores que se espallan por todo o núcleo urbano e afectando ademais a unha zona de baño río abaixo, como é a desembocadura do Tea”.
“O equipo de goberno de Salvaterra mostra unha completa pasividade e total despreocupación pola saúde dos seus veciños e veciñas de Salvaterra”, subliña Martínez. Por outra banda, o responsable nacionalista salienta que esta situación “non é nova”, senón que “xa foi criticada en diversas ocasións polo Bloque, sen que o goberno de Arturo Grandal fixera nada por remedialo”.

Gabriel Martínez lembra que o último contrato formalizado para o control do mantemento da depuradora é do ano 2006, aínda que o goberno municipal sigue pagando arredor de 12.000 euros anuais a unha empresa para que realice estas tarefas de mantemento. “Os feitos demostran que nin a xestión nin os servizos de mantemento son as axeitadas, dado que se producen vertidos ao Miño e que os veciños e veciñas de Salvaterra teñen que soportar malos cheiros”, asegura o responsable nacionalista, quen considera que a concellería correspondente “non leva a cabo o seu traballo de control de correcto mantemento destas instalacións” e o gasto para o seu mantemento “proba unha vez máis a ineficacia do goberno local, dirixido por Arturo Grandal”.

Gran Baile e Campionato de Tute no Centro Cultural Os Muíños de Oliveira, en Ponteareas

apeneiradocondado — Mon, 05 Oct 2009 11:54:27 +0000

O Centro Cultural Os Muíños de Santiago de Oliveira organiza tódolos venres ás doce da noite un Gran Baile amenizado polo dúo Alameda. No transcurso da velada haberá sorteos con magníficos premios. Este sábado día 10 de outubro ás 21:00 horas haberá unha churrascada. O prezo por persoa é de oito euros e todos os interesados en participar deberán anotarse no teléfono 625 45 57 89.

Ademais, na cafetería deste centro cultural estase a organizar un Campionato de Tute tódolos sábados a partires das 22:30 horas. A parella gañadora levarase dous porcos, duas follas de bacalao, duas botellas de aceite de oliva e dez quilos de azucre. Para as parellas perdedoras haberá duas follas de bacalao, dez litros de aceite de oliva, outros dez de aceite de xirasol e duas botellas de whisky. A inscrición no Campionato de Tute farase no propio día.